Lete Lasa anima aos regatistas galegos que participarán no Campionato do Mundo Xuvenil ISAF de Chipre, no Campionato do Mundo Absoluto de Valencia e no Campionato Europeo Xuvenil de Gales

O secretario xeral para o Deporte visita aos deportistas que se adestran no Centro Galego de Vela en Vilagarcía

Pontevedra, 9 de xullo de 2013.- O secretario xeral para o Deporte, José Ramón Lete Lasa, visitou hoxe o Centro Galego de Vela en Vilagarcía, onde se adestran os deportistas galegos que tras a súa clasificación por Ránking Nacional, participarán no Campionato do Mundo Xuvenil ISAF de Chipre do 12 ao 21 de xullo, no Campionato do Mundo Absoluto de Valencia e no Campionato Europeo Xuvenil en Gales do 14 ao 22 de agosto, con fin de darlle ánimos.
José Ramón Lete Lasa estivo acompañado do Alcalde de Vilagarcía, Tomás Fole; do Presidente de Portos de Galicia, José Juan Durán Hermida; do Presidente da Federación Galega de Vela (FGV), Manuel Villaverde; e do Director técnico da FGV, Alberto García Villar.
Os regatistas da selección galega 420 encóntranse concentrados no CGV desde a primeira semana de xullo, onde levan a cabo a preparación para os Mundiais e Europeo.
Pedro Martínez e Luis Bugallo do Liceo Casino de Vilagarcía, participarán nos tres campionatos, cubrindo a única praza Española para o Campionato do Mundo Xuvenil ISAF.
Adrián Domínguez e Calixto Abalo asistirán ao campionato de Europa Xuvenil en Gales, sendo o segundo barco dos tres que se clasifican por País e tamén ao campionato do Mundo Absoluto que se celebrará en Valencia entre o 22 e o 31 de xullo, xunto con Andrés Álvarez e Sergio Rodríguez, ambos barcos pertencentes tamén ao Liceo Casino de Vilagarcía, e outros dous barcos do RCN de Portosín patroneados por Pablo Ávilo e Alicia Ávila xunto con Antón Calo e Carmen Martínez respectivamente.